වතු ආශ්‍රිතව වැඩ කරන බහුතරයක් ද්‍රවිඩ ජනතාවයි. ඔව් හු වනාහි නිදහසින් පසු ශ්‍රී ලංකාව ගොඩනැගීමට වැඩිම දායකත්වයක් ලබා දුන් ජනතාවයි. එහෙත් මේ මොහොත වන විටත් ශ්‍රී ලංකාව තුළ ජන ප්‍රජාවක් ලෙස ගත් කළ ඉතාම දුක්ඛිත තත්වයක් ජීවත්වන්නෝ ඔව්හුය. පහත ඵලවන කිතුනු ගීතය තුළින් රාව නැංවෙන්නේ මෙරට කඳුකර ද්‍රවිඩ කම්කරු ජනයාගේ හෘද ස්පන්දනයි.

ශ්‍රී ලංකාවේ කිතුනු සභාවන්ට අයත් අැදහිලිවතුන් අතර පීඩිතම ජනකොටස් දෙක වන්නේ කඳුකරයේ කම්කරු ජනතාව හා මුහුදුකරයේ දුප්පත් ධීවර ජනතාව.

ඔවුන් පීඩිත නිසාම දෙවිඳුන් කෙරෙහි අප්‍රමාණ භක්තියකින් යුක්තයි. එ් අප්‍රමාණ භක්තිය නිසාම ඔවුන් තම සොච්චම් අාදායමෙන් කීයක් හෝ පල්ලියේ සම්මාදම් වලටත් දමනවා.

මේ පිඩිත පූජාවන් දෙක අතරින් ධීවරයා ගැනත් ඔවුන්ගේ ප්‍රශ්න ගැටළු ගැනත් යම් කතා බහක්, මැදිහත් වීමක් කිතුනු සභාවන් වලින් සිදු වූවත් කඳුකරයේ දෙමළ කම්කරු ප්‍රජාව ගැන නම් එවැනි මැදිහත්වීමක් සිදු නොවන තරම්. සම්ප්‍රදායික කිතුනු සභාවන්ගේ මෙම අැල් මැරුනු බව නිසාම පසුගිය දශක දෙක තුළ සැලකිය යුතු කිතුනු දෙමළ වතු කම්කරු පිරිසක් මූලධර්මවාදි සභාවන් වෙත අැදි ගොස් තිබෙනවා.

මේ කටුක යථාර්ථය එනම් ද්‍රවිඩ කම්කරු ප්‍රජාව ගැන කිතුනු සභාවන් හි අවධානයක් නොමැතිකම පිළිබඳ එක්තරා අාකාරයක පිළිගැනීමක් කරමින් ගාල්ල කතෝලික රදගුරු තුමා පසුගිය දිනෙක කතෝලික ලේඛකයින්ගෙන් ඉල්ලා තිබුණේ මෙම ද්‍රවිඩ වතු කම්කරු ජනතාව ගැන ලියන ලෙසයි.

වතු ආශ්‍රිතව වැඩ කරන බහුතරයක් ද්‍රවිඩ ජනතාවයි. ඔව් හු වනාහි නිදහසින් පසු ශ්‍රී ලංකාව ගොඩනැගීමට වැඩිම දායකත්වයක් ලබා දුන් ජනතාවයි. එහෙත් මේ මොහොත වන විටත් ශ්‍රී ලංකාව තුළ ජන ප්‍රජාවක් ලෙස ගත් කළ ඉතාම දුක්ඛිත තත්වයක් ජීවත්වන්නෝ ඔව් හුය.

ශ්‍රී ලංකා ජනහන දරිද්‍රතා දර්ශකය 2016 දී පහත පරිදිය.

නාගරික   1.9
ග්‍රාමීය     4.3
වතු        8.8

වතු අංශයේ දරිද්‍රතාවය නාගරික දරිද්‍රතාවය මෙන් 400% කට වඩා වැඩිය. ග්‍රාමීය දරිද්‍රතාවය මෙන් 200% කට වඩා වැඩිය.

අධ්‍යාපනය පිළිබඳ සැලකිල්ලට ගත් විට වතු අංශයේ දරුවන් පිළිබඳ කතන්දරය අතිශ්‍ය ඛේදනීයය. උසස් පෙළ දෙමළ භාෂාවෙන් හැදැරිම සඳහා ඇතැම් දිස්ත්‍රික්කවල දිස්ත්‍රික්කයටම ඇත්තේ එක් පාසලකි.

කඳුකර ද්‍රවිඩ ජනතාව ශ්‍රී ලංකාවට පැමිණ වසර 200ක් ගත් වූවත් ඔවුන් අතරින් 15 00 000 ක්ට ආසන්න පිරිසකට තම පදිංචිය තහවුරු කරන ලිපිනයක් නොමැතිකමින් දැඩි දුෂ්කරතා වලට මුහුණ දෙති. අවුරුදු 200 ක් තුළ පරම්පරා ගණනාවක් ඉතා දුෂ්කර කොන්දේසි යටතේ මෙරටට විදේශ විනිමය උපාය දුන් මේ ජනතාව එඞ්රස් නැති මින්ස්සු බවට පත් ව සිටිද්දී ඔවුන් වෙනුවෙන් හඬක් නොනඟන ලේඛකයින් යනු ලේඛකයින් නොවේ.

පීඩාවට පත්වන කවර ජන කොටසක් පිළිබඳ වූවද ප්‍රථමයෙන් ලිවිය යුත්තේ කිතුනු ලේඛකයින්ය. මන්ද කිතුනු ලේඛකයා යනු පීඩිතයා තුළ ජේසු තුමන් දුක් විඳින බව අදහන්නෙකු වන නිසාය. කනගාටුවෙන් වූවද කිය යුත්තේ සාතිශය බහුතර කිතුනු ලේඛකයින් ’කිතුනු ලේඛක’ යන්න ආභරණයක් කරගෙන සිටිනවා මිස දුක් විඳින ජේසුගේ කටහඬ බවට පත්ව නොමැති බවයි.

පහත ඵලවන කිතුනු ගීතය තුළින් රාව නැංවෙන්නේ මෙරට කඳුකර ද්‍රවිඩ කම්කරු ජනයාගේ හෘද ස්පන්දනයි.

අපේ කඳුළු වගුරා
රබර් කිරට හරවා
අපේ රුහිරු හෙලලා
තේ ලේ පැහැ ගන්වා
රන් කහවනු මේ දේශට දුන්නා
විනිමය උපයා රට ගොඩ නැගුවා
ජේසු සාමි ඔබ ඒ  බව දන්නවා
දෙව් ස්වරූපය අපිටත් තිබෙනවා.....

කඳුකරයේ මහා කඳුවැටි තරමට
දුක් උහුලන අපේ දුක දැකලා
ඔබටත් ඇඩෙනවා ඇති ජේසු
ඔබටත් රිදනවා ඇති ජේසු

වත්තේ හිමියට ගැට ගහලා
ලැයිම් ගුලාවෙම දිවි ගෙවනා
කතිරේ හිමිකම පමණක් තිබෙනා
වාල්ලු වාගෙයි අපි තවමා
මිනිසත්කම වෙත නික්මි යන්නට
ජේසු සාමි අප හා එක්වනු මැන

කල්ලතෝනි හංවඩුවෙන් මිදිලා
අපේ බස නොමරා - තිලකය නොමකා
දෙවැනි නොවන පුරවැසියන් වන්නට
දරුවන් සේ පිළිගැනුම් ලබන්නට
මිනිසුන් වන්නට - නැගී සිටින්නට
ජේසු සාමි අප හා එක්වනු මැන

අපි ඉපැදුනු මේ පොළෝ තලේ
අපි වැළලෙන මේ පොළෝ තලේ
බිම් අගලක හිමිකමක් ලබන්නට
අපේ කියා ලිපිනයක් ලබන්නට
ඔබ පෙරටුව පෙරමුණට නැගෙන්නට
ජේසු සාමි අප හා එක්වනු මැන

jesustodaysl 2 වන වසර 23 වන සතිය 2018 අගෝස්තු 12

 

 

Comments powered by CComment